وأنا معدية في طريقي للمطبخ
أجهز لقمة بعد يوم عمل
سمعت إن مساعد الأراجوز بيقول إن معندهمش كهربا في عموم البلد
ما هو أصل الأراجوزات بتحتاج سنيد
ميسلمش الأمر برضك
وأنت طالع سلم الطيارة تتكعبل في ديل تانية البنطلون
وتتكعور والعالم يضحك عليك
أو تبقى اسم النبي حارسك وصاينك ملك كدة ملو هدومك
وواقف بالحتة الفزدقي بتسمع سلام وطني
وعامل فيها شجيع السيما
وأنت مزرر الجاكتة حبة فوق وحبة تحت
ولا لا مؤاخذة تبقى ابن ليلة حمرا مطلعتلهاش شمس
ويجيبوك على ملا وشك
ويدخلوك تعمل ماكياج وتلبس هدوم الدور
عشان الستارة هتفتح بعد خمس دقايق
وتقف تسبل للجمهور
وأنت بتسحب منهم حبابي عنيهم
يا سلام
على ده مسرح يا ولاد
والله أنا اللي ما يغلبني غلباوي بعون الله
بقعد فاغرة فاهي قدام شوية الأراجوزات دول
واهو كله بثوابه
الواد مساعد الأراجوز
لابس الحتة الهاي كول
ومستني الزراير
زرار دموع
زرار سهوكة
زرار تهديد أجوف
واهو عالبركة
الاوكرانيين عقبال أمالتك
خدوا لقب لاجئين
أصل محدش واخد باله
إن اللقب ده جرسة مش شرف
جرسة في جبين العالم المتقدم بتاع الليفة والصابون
إنه لسة بيسمح
ولا بيخطط
لحروب قذرة مشافتش ليفة ولا صابون في حياتها
وكمان بيذرف عليها دموع
مغرقة الكوكب
اشي احتباس حراري
يوه
كل مرة أنسى
اشي تغييرات مناخية
اشي رونا وأخواتها
لحد ما الكوكب قال جاي
يا أنا يا أنتوا
وأنا والله وما لكو عليا حلفان
من يومها وأنا بهدي في سعادته
من لمون لحلبة لكراوية لكاموميل
مخلتش
Facebook Comments